Бүгінгі түн...

Бүгінгі түн...

Бүгінгі түн, көз ілдім бе,
Білмедім..
Ғұмыр ма бұл сүргенім...
Жанарымды жас буып жуып жаттыңыз..
Миығынан күліп тұрды түн керім
Оянсам, құр сүлдерім..

Түс екенсіз..
өңім деуге, қия алман...
Күтер қандай сый алдан..
Жүрегіме құйыласыз жыр болып..
Сағынышқа сия алман..

Қайда жүрсіз..
Барсыз ба өзі, таба алман..
Жазмышым боп төгілесіз жанардан..
Өз өртіме өзім күйіп жатамын..
Өзегімде сан арман...

Сағымсыз ба..
Бағымсыз ба жырдағы
Сіз боп елес,
Түнгі ұйқымды ұрлады..
Сор да емессіз, жақынымсыз, жат емес
Әлдилейді қиялымның құндағы7

Ұғынамын..
Қасымдасыз.. жырақта..
Жүрегімнің ішінде де сұрақ бар..
Қуанышым... жұбатшы кеп өтінем..
Жанымды өзің, жылатта...

Дерт те емессіз..
сағынышсыз, қанбаймын..
Өн бойымды жаулап алған қандай мұң?
Жарығымсыз.. өшірмеңіз өртімді..
Сіз жоқ жерде, жанбаймын..

Өзімді өзім..
осылайша алдаймын..
Ессізбін бе,
естімін бе, қандаймын?
Әлденемді аяқасты жоғалтқан
Ең дәрменсіз жандаймын..

Сүйеді екем, мендік сезім құдірет..
Сертім осы, танбаймын..

Толқын Қабылша