Екі елді жалғаған азамат

Екі елді жалғаған азамат

2026 жылдың 29 қазанында әл - фараби атындағы Қазақ ұлттық университетінде Оңтүстік Кореяның Ханкук шетел тілдері университетінен келген профессор Сон Енг Хунның қонақ дәрісін тыңдадық.
Сон Енг Хун мырза Қазақстан тарихы бойынша PHD докторы, Орталық Азия зерттеулері институтының директоры, 20 жылдан астам Ханкук университетінде корей азаматтарына қазақ тілін оқытып, қазақ тілі мен корей - қазақ тілдері оқулықтарының авторы атанған профессор.
Сон Енг Хун мырза 30 жыл бұрын әл - фараби атындағы Қазақ ұлттық университетінің сол кездегі шетел азаматтарына арналған дайындық факультетінде, қазіргі ЖОО дейінгі білім беру факультетінде, біздің кафедрамызда қазақ тілін үйренген еді. Қазақ тілін меңгеріп жүріп қазақ тарихы туралы ғылыми зерттеу жұмысымен де айналысты.
Еліне оралған соң, 2004 жылы Ханкук шетел тілдері университетінде Орталық Азия зерттеулері институтын ашып, оған қазақ тілін оқыту үшін алғашқы 20 корей азаматын қабылдаған екен. Содан бері аталған бағыттар бойынша ғылыми зерттеулерін де, ұстаздық қызметін де үзбей атқарып келеді. Осы жылдар ішінде Ханкук университетінде қазақ тілін үйренген студенттерінің университетаралық алмасу бағдарламасымен Қазақстанға келіп, тілді одан әрі тереңдетіп меңгеруіне де атсалысып жүрді. Базалық біліммен кафедраға келген студенттерден Кореяда қазақ тілін кімнен үйрендіңіз дегенде "Мистер Соннан" деп жауап беретін. Мистер Сонның Құдайберген деген қазақша да аты бар. Мінеки, бүгін өзіміздің 30 жыл бұрынғы түлегіміз, бүгінде үлкен ғалым, танымал зерттеуші, профессор әріптесімізбен кездестік!
Профессор дәріс барысында тыңдаушылармен Ханкук университетіндегі қазақ тілін оқыту мәселесі, студенттердің тіл үйренудегі артықшылықтары мен кездесетін қиындықтары, жазған оқулықтары жөнінде және болашақ жоспарлары туралы бөлісті. Тыңдармандардың неліктен қазақ тілін таңдадыңыз деген сауалына, профессор өзінің түркі халықтарына деген қызығушылығы мен қазақ елінің көшпелі мәдениеті арқау болғанын айтты. Бұдан профессордың осы үлкен арман - мақсатын арқалап 90 жылдары тәуелсіздіген жаңа алған Қазақстанға Корей елінен алғашқылардың бірі болып келіп, тіл үйреніп, өздігінен тарихты зерттеп, ғылыми жұмысын қорғап, елге оралған соң да, қазақ мәдениеті мен тарихын, дәстүрін Корей жастарына насихаттауды тоқтатпағаны қазақ халқына деген үлкен құрметі деп түсіндік. Алғысымыз шексіз!
Қазақ тілінің мәртебесін әлемдік деңгейде көтеріп жүрген профессор Сон Енг Хун мырзаға сарқылмас қайрат пен жаңа ғылыми табыстар тілейміз!

Г. Ә. Мұсаева, Г. Ә. Машинбаева
Әл - Фараби атындағы ҚазҰУ
Шетелдіктердің тілдік және жалпы білім беру дайындығы кафедрасы