Ұлттық өнер – рухани құндылықтар сабақтастығы

Ұлттық өнер – рухани құндылықтар сабақтастығы

Әл - Фараби атындағы Қазақ ұлттық университеті жоғары оқу орнына дейінгі дайындық кафедрасының оқытушылары мен тыңдаушылары қазақтың дәстүрлі музыка өнерін дәріптеу, ұлттық мәдени мұраны тану және рухани құндылықтарды насихаттау мақсатында Құрманғазы атындағы Қазақ ұлттық халық аспаптар оркестрінің концерт залында өткен «Бүкіл әлем таныған керемет топ» атты концерттік бағдарламаны тамашалады.
Аталған мәдени іс - шара қазақ музыка өнерінің дамуына өлшеусіз үлес қосқан көрнекті өнер қайраткерлері, ұлттық оркестрдің негізін қалаушылар Махамбет Бөкейханов, Лұқпан Мұхитов және Қамбар Медетовтің жарқын есімдері мен шығармашылық мұрасына арналды. Концерт бағдарламасы арқылы өнер майталмандарының ұлттық музыка мәдениетін қалыптастырудағы тарихи еңбегі ұлықталып, олардың кейінгі ұрпаққа қалдырған рухани мұрасының маңыздылығы айқындалды.
Концерт барысында Құрманғазы атындағы Қазақ ұлттық халық аспаптар оркестрінің орындауындағы күйлер мен музыкалық шығармалар көрермендерге ерекше эстетикалық әсер сыйлады. Ұлттық аспаптардың үйлесімді үні мен кәсіби орындаушылық шеберлік қазақ халқының музыкалық дәстүрінің тереңдігін, көркемдік ерекшелігін және мазмұндық байлығын кеңінен танытты. Бұл өнер кеші қатысушыларға ұлттық музыка мұрасын тереңірек түсінуге, оның тарихи - мәдени мәнін зерделеуге және дәстүрлі өнердің қазіргі қоғамдағы рухани маңызын бағалауға мүмкіндік берді.
Мұндай мәдени - танымдық іс - шаралардың білім алушылардың рухани - адамгершілік тәрбиесін қалыптастыруда, эстетикалық талғамын дамытуда және ұлттық мәдениетке деген құрметін арттыруда маңызы зор. Сонымен қатар ұлттық өнерді дәріптеу арқылы жас ұрпақтың тарихи жады мен мәдени бірегейлігін нығайтуға, ұрпақтар сабақтастығын қамтамасыз етуге және отандық мәдени мұраны халықаралық деңгейде танытуға негіз қаланады.
Іс - шара Тұрақты даму мақсаттары аясындағы ТДМ 4 – «Сапалы білім беру» және ТДМ 11 – «Тұрақты қалалар мен қауымдастықтар» бағыттарымен сабақтасады. Атап айтқанда, мәдени - танымдық іс - шаралар арқылы білім алушылардың жан - жақты дамуына жағдай жасау, инклюзивті әрі сапалы білім беру кеңістігін қалыптастыру, сондай - ақ материалдық емес мәдени мұраны сақтау мен дәріптеу міндеттері жүзеге асырылады.
Әл - Фараби атындағы Қазақ ұлттық университеті білім беру үдерісінде академиялық біліммен қатар, ұлттық мәдениет пен рухани құндылықтарды ұштастыруға ерекше мән береді. Осы бағыттағы мәдени іс - шаралар білім алушылардың дүниетанымын кеңейтіп қана қоймай, олардың ұлттық мұраға деген жауапкершілігін арттыруға және мәдени сабақтастықты сақтауға ықпал етеді.
Ұлттық өнерді тану – өткенге тағзым, бүгінге құрмет, болашаққа аманат. Рухани мұраны сақтау мен дәріптеу – ұлт мәдениетінің өміршеңдігін қамтамасыз ететін маңызды құндылық!

Әл - Фараби атындағы ҚазҰУ
ЖОО - ға дейінгі дайындық кафедрасының
аға оқытушылары: С. Р. Нұртілеуова, Ж. П. Қасымова