Тәуелсіздік – мемлекеттің тірегі

Тәуелсіздік – мемлекеттің тірегі

Әрбір халық үшін тәуелсіздік – ең қасиетті, ең қымбат ұғым. Ол тек мемлекеттің шекарасын бекітіп, туын желбіретумен өлшенбейді. Тәуелсіздік – ұлттың өз тағдырын өзі шешуге, өз болашағын өзі құруға толықтай құқығы бар екенін айқындайтын ұлы мәртебе. Бұл ұғым тек өткеннің тарихына байланысты емес, ол бүгініміз бен ертеңіміздің негізі.
Қазақстан үшін тәуелсіздік – қанмен, термен, ғасырлар бойғы армандармен келген асыл қазына. 1991 жылы еліміз егемендігін алып, тарихтың жаңа парағын ашты. Сол күннен бері біз өзіміздің ұлттық болмысымызды сақтап, оны жаңғыртуға бет алдық. Мемлекетіміздің тұғырына айналған Елтаңба, Ту, Әнұран – біздің бірлігіміздің, рухымыздың символы.
Біз үшін тәуелсіздік – тек тарихи оқиға ғана емес, ол әркімнің жеке өмірімнің, болашағының тірегі. Егер бүгін біз ана тілімізде еркін сөйлеп, өзіміздің мәдениетімізді мақтан етіп, білім алып, арман қуып жүрсек, бұл – тәуелсіздіктің жемісі. Тәуелсіз елдің ұрпағы болу – үлкен мақтаныш, бірақ одан да үлкен жауапкершілік. Бізге жеткен еркіндікті сақтау – біздің қасиетті борышымыз.
Тәуелсіздік – бұл тек өткеннің жеңісі емес, ол әрбір күннің сынағы. Елдің бірлігі мен тұрақтылығы болмаса, тәуелсіздік те әлсіреуі мүмкін. Сондықтан бірлік, ынтымақ, өзара түсіністік – ел болашағының кепілі. Біздің міндетіміз – ата - бабаларымыздың аманатын орындап, егемендікті нығайту.
Біз Қазақстанның болашағын жарқын елестетеміз. Себебі біздің ұрпағымыз білімді, саналы, жігерлі. Біздің қолымызда мемлекетімізді жаңа биіктерге жеткізу мүмкіндігі бар. Тәуелсіздікке жету қиын болса, оны сақтау одан да қиын. Бірақ біз күшімізді біріктірсек, елімізді әлемдік деңгейде беделді, дамыған мемлекетке айналдыра аламыз.
Елдің елдігі – оның тәуелсіздігінде. Бұл сөздің мәні тереңде жатыр. Біз бұл құндылықты бағалап қана қоймай, оны күнделікті өмірде сезініп, әрекетімізбен дәлелдеуіміз қажет. Тәуелсіздігіміздің тұғыры биік, болашағы жарқын болғай!

Шетелдіктердің тілдік және жалпы білім беру дайындығы кафедрасының оқытушылары Б. М. Айтбаева, М. П. Ешимов