Студенттердің ғылыми конференциясы өтті

Студенттердің ғылыми конференциясы өтті

Бүгін әл - Фараби атындағы Қазақ ұлттық университетінде жыл сайын дәстүрлі түрде өтіп тұратын «Фараби әлемі» атты халықаралық студенттер мен жас ғалымдардың ғылыми конференциясы болып өтті. Жоғары оқу орнына дейінгі білім беру факультетінде де аталмыш конференцияның бірнеше секциясы өз жұмысын бастады. 4 - 5 сәуірге жоспарланған студенттер конференциясының қазақ және орыс тілдері бойынша секциясы шетелдік тыңдаушылардың баяндамаларын тыңдады. «Қазақ тілі» секциясында модератор: филология ғылымдарының кандидаты, доцент Г. Ә. Мұсаева, хатшы: филология ғылымдарының кандидаты, аға оқытушы Г. Ә. Машинбаева болды. Сонымен қатар секция жұмысына кафедраның аға оқытушылары Р. И. Дүйсенбаева мен М. П. Ешимов те қатысты.
Конференцияға қатысушылар әртүрлі тақырыпта мақалалар жазып, баяндама жасады. Мысалы, тарих, экономика, салт - дәстүр, тіл, әдебиет, мәдениет, дін т. б. тақрыптарда ғылыми еңбектерін көпшілік назарына ұсынды. Қазақстан Республикасы мен ТМД елдерінен қатысқан студенттер өз ғылыми еңбектерін қазақ, орыс және ағылшын тілдерінде ұсынса, шетелдік студенттер қазақ және орыс тілдерінде жазылған ғылыми мақалаларын ұйымдастырушылар алқасына жолдаған. Ғылыми конференция ұйымдастырушыларының атап өтерлігі де осы тұс. Себебі Қазақстан Республикасына келіп, бірнеше ай ғана тіл меңгеріп, сол оқыған санаулы уақыттың ішінде өзге тілде сөйлеудің өзі былай тұрсын, қазақша ғылыми, өз ойын пайымдай, өзектілігін айқындап көрсетіп, мақсаты мен мүддесін нақтылай көрсеткен жұмыс жазу оңай нәрсе емес.
Стилі, мазмұны, мағынасы келісті келген, ғылыми жұмыстарға қойылатын талаптарға толығымен жауап бере алатын, өзінің өзектілігімен, тілінің жатықтығымен, ерекшелігімен ерекше атап өтерлік жұмыстар да жоқ емес. Атап айтар болсақ, Конференцияда Қытай Халық Республикасы, Түрікменстан, Түркия, Үндістан сынды елден келген шетелдік студенттер қазақ тілінде баяндама жасады. Айқын Жайдар «Қытайдың атақты ақыны – Су Ши» деген тақырыпта баяндама жасап, тақырып бойынша қойылған сұрақтарға нақты әрі толық жауап берді. Сол себепті де Айқын Жайдардың ғылыми жұмысы жоғары бағаланды. Сонымен қатар Аймер Дәулет «Суды үнемдеу», Бендангиэнла, Айер Бендангинла «Үндістан», Мелаева Нуртач «Менің елім – Түрікменстан», Нұрболат Қарлығаш «Қытай халқының ұлттық аңыздары» Сосаңгренба «Нага туралы» және өзге де шетелдік студенттер т. б. тақырыптарда баяндама жасады.
Баяндамашыларға секция жұмысына қатысып отырған оқытушылар мен шетелдіктердің тілдік және жалпы білім беру дайындығы кафедрасында қазақ тілін меңгеріп жатқан шетелдік студенттер сұрақтар қойды.
Конференцияны ұйымдастырушылар алқасы студенттерге табыс, болашақтарына сәттілік тілеп, ғылым жолында еңбектерінің жана беруіне тілектестіктерін білдірді. Секция жұмысының соңында баяндама жасаған шетелдік студенттерге диплом мен конференцияға қатысқаны үшін сертификаттар табысталды.

Әл - Фараби атындағы ҚазҰУ
Шетелдіктердің тілдік және жалпы
білім беру дайындығы кафедрасының оқытушылары
М. П. Ешимов, Г. Ә. Мұсаева, Г. Ә. Машинбаева