Д. А. Қонаевтың үй - мұражайына саяхат

Д. А. Қонаевтың үй - мұражайына саяхат

Әл - Фараби атындағы Қазақ ұлттық университетінің (www. kaznu. kz) экономика және бизнес жоғары мектебінің 1 курс студенттері Алматыдағы Дінмұхамед Ахметұлы Қонаевтың үй - мұражайына мен мемориалдық мұражай - пәтеріне саяхат жасап қайтты.
Қонаевтың үй - мұражайына саяхат жасаудың басты мақсаты студенттердің танымдық көзқарастарын, ой - өрістерін, дүниетанымдарын кеңейту, туған жерге деген сүйіспеншіліктерін арттырып, патриоттық сезімдерін ояту.
Қазақ елі үшін аянбай еңбек етіп, қазақ елінің дамуына ерекше үлес қосқан, өткен ғасырда «Ғасыр саңлағы» атанған аса көрнекті мемлекет және қоғам қайраткері, қазақ халқының бір туар азаматының өмірімен танысу, оның өмірлік ұстанымдарын зерттеу – әрбір қазақтың парызы болып табылады.
Қазіргі күні мұражайға айналған үйде Дінмұхамед Ахметұлының жекелеген заттары, техникалық, анықтамалық және көркем әдебиеттер, өнер жөніндегі альбомдар, авторлардың жекелей қолтаңбасы жазылған кітаптары, жиһаздар, тұрмыстық заттар, мерейтойларына арналған көптеген сыйлықтар мен экспонаттар, басқа да әр алуан заттар бар. Аталған заттарды мұражайға Дінмұхамед Ахметұлының немере інісі Диар Асқарұлы Қонаев табыс етіпті. Үй - мұражай мұрағатында 5 мыңнан астам кітаптар бар. Оның көпшілігі Кеңес үкіметі кезіндегі алуан түрлі басылымдар. Олардың арасында Еуропа баспаларында басылған және кеңестік кезеңдегі кітап сөрелерінен кездеспейтін басылымдар да бар.
Экскурсия барысында студенттер Дінмұхамед Ахметұлы Қонаев туралы тың мәліметтермен танысып қайтты.
Заманауи қазақстандық мəдениетті əлемге таныту аясында ұлттық мəдениетпен, қасиетті рухани құндылықтармен таныстыру арқылы біз өткен тарихымызды, мәдениетімізді жастарға, студенттерге дәріптеу. Оларды ұлттық мәдениетімізді құрметтеуге тәрбиелеуде саяхаттың берері мол болды.

Өзенбек Е. Р.
Тарих факультетінің 1 - курс магистранты
Әл - Фараби атындағы Қазақ ұлттық университеті