Мейірімділік жүректен

Тақырыбы: Мейірімділік жүректен...
Мақсаты:
Жанашырлық, мейірімділік, адамгершілік құндылықтары туралы түсініктерін кеңейту.
Міндеттері:
- Адам бойындағы құнды қасиеттер туралы түсініктерін кеңейту;
- Қамқорлық жасауға жетелеу;
- Мейірімділікке тәрбиелеу.
Көрнекі құралдар: теледидар, бейнетаспа, үнтаспа, «Түймеқыз» ертегісінен үзінді, қызыл және жасыл түсті ермексаз, ағаш сұлбасы, иілгіш сым темір, доп.
Шаттық шеңбер
Балаларды шеңберге жинап:
Қайырлы күн, балалар! Сендерді көргеніме өте қуаныштымын, бүгін күн ерекше нұрын шашып тұр, осы көңіл күйімізбен «Ертегілер әлемі» әнін айтайық.
Ән «Ертегілер әлемі»
Әңгімелеу
- Балалар, қазір орындалған «Ертегілер әлемі» әні не туралы?
- Ертегілер әлемінде кімдер тұрады?
- Қандай ертегілерді білесіңдер?
- Сүйікті ертегі кейіпкерлеріңді атаңдар.
- Ол кейіпкерлердің мінездерінің қандай қасиеттері сендерге ұнайды?
- Балалар, бүгін мен сендерге бір ертегі үзіндісін дайындап қойдым, соны көрейік.
«Түймеқыз» ертегісінен үзінді тамашалау
• Балалар, ертегі сендерге ұнады ма?
• Қалай ойлайсыңдар, Түймеқыздың бойында қандай қасиеттер бар екен?
• Балалар, сендер Түймеқыздың орнында болсаңдар не істер едіңдер?
• Күнделікті қандай мейірімді іс - әрекеттер жасауға болады?
Сергіту сәті
Күнге қарап қолымды
Бір, екі, үш деп соғайын /қолды соғу/
Қарап тұрған көршіме
Мен қолымды бұлғайын /бір - біріне қол бұлғау/
Жылы - жылы жүзбенен
Маңдайыннан сипайын /сипау/
Жылы - жылы сөзбенен
Жүрегімді сыйлайын /жүректі ұсыну/
Ыстық алақаныммен
Қолыңды бер қысайын /қолды қысу/
Амандасып өзіңмен
Құшақтасып алайын /құшақтасу/
Үнтаспадан баяу күй ойнайды
«Балапанды құтқару»
Балалар, қараңдаршы, ұядан балапан түсіп қалыпты.
Балапанды мейірлене алақанымызға салайықшы, ол тоңып қалыпты, дір - дір етеді, ыстық лебімізбен балапанды үрлеп жылытайық, алақанымызда тербетейік, өзіміздің жүрегіміздің соғуымен балапанның жүрегін оятамыз, алақанымызды жүрек тұсына жақындатамыз, күнге көтеріп жылытамыз, құлағымызға жақындатып жүрегінін соғысын тыңдайық.
- Балалар, жүрегінің лүпілін естіп тұрсыңдар ма?
- Балапанның жүрегі қалай соғады? Тук - тук, тук - тук.
- Балалар, балапан сендерге рахмет айтады, тыңдандаршы...
- Балалар, балапанымызды ұшырып жіберейік...
• Биікке самғай бер!
• Қанатың талмасын, балапаным!
• Жолын болсын!
• Аман бол, құсым!
• Адамзатты аяла!
• Табиғаттың сәні бол, адамзаттың әні бол!
Дәйек сөз:
- Балалар, мейірімділік жүректкен демекші, сендердің кішкентай жүректерің, ұядан түсіп қалған балапанды оятып, жүректеріңнің жылуымен жылытып, балапанға өмір сыйладыңдар.
- Балалар, не сезініп тұрсыңдар?
Мен қуанып тұрын, ал сендер өз көңіл - күйлерінді ермексаздан жүрекшелер жасап көрсетіңдер.
Шығармашылық сәт
Балалар қызыл түсті ермексаздан жүрекшелер, жасыл түсті ермексаздан жапырақтарын жасап, Мейірімді ағашқа іледі.
Ойын: «Дүниеде не мейірімді?»
Допты лақтырып сұрақ қою.
- Балалар, дүниеде не мейірімді?
- Күлімдеген күн мейірімді!
- Кіршіксіз ақ қар мейірімді!
- Таза мөлдір су мейірімді!
- Бәрімізді көтеріп тұрған жер мейірімді!
- Аяулы анам мейірімді!
- Қадірлі әкем мейірімді!
- Әлпештеген әжем мейірімді!
- Еркелеткен атам мейірімді!
- Жылы жүзді ұстазым мейірімді!
- Тату - тәтті достарым мейірімді!
Балалар, бүгін біз балапанға көмек көрсете отырып, «жанашырлық», «мейірімділік», «қамқорлық» деген сөздерді іс - әрекет арқылы түсіндік. Балапан – табиғат бөлшегі. Табиғатқа, бір - бірімізге, мен сендерге, сендер маған, үлкен кісілерге, ата - аналарымызға, достарымызға, өзімізден кішілерге қамқор, мейірімді болайық.