Әл - Фараби атындағы ҚазҰУ мұражайлары

Әл - Фараби атындағы ҚазҰУ мұражайлары

Еліміздің ең ірі білім ордасы - Әл - Фараби атындағы Қазақ Ұлттық университетінің тарихы мен мәдениетінің, білім деңгейі мен қорының басты көрсеткіші мұражайлар екені белгілі. Бұл мұражайлар - өнегелі мамандарын тәрбиелейтін университеттің ғылыми - ақпараттық, танымдық, тәрбиелік бөлімшесі. Олардың негізгі мақсаты - халқымыздың бай тарихи - мәдени, рухани мұрасын сақтау мен насихаттау, білім мен ғылым саласында жеткен жетістіктерін дәріптеу болып табылады. ҚазҰУ қабырғасында 6 мұражай бар. Олар әр жылдары салынып, әрқайсысы жеке - жеке кешенді құрайды.
Бірінші мұржай - Әл - Фараби атындағы Қазақ Ұлттық университеті мұражайы. Университет мұражайы 1989 жылдан бастап жұмыс істейді, 20 жылдан кейін оған ауқымды қайта қалпына келтіру жұмыстары жүргізілді. Жаңа мұражайдың ашылуы ҚР Президенті Н. Ә. Назарбаевтың 2009 жылы 13 қазан айындағы әл - Фараби атындағы ҚазҰУ - ға келу сапарымен орайластырылған болатын. Бұл мұражайда ҚазҰУ тарихы, оның іргесін қалап, өнегелі өмірін осында жұмыс істеп өткізген тарихи тұлғалардың өмірі мен қызметін баяндаумен, бай мұрасымен ерекшеленеді.
Екінші мұражай - Әл - Фараби бабамызға арналады. Мұражай Қазақ ұлттық университетіне 1991 жылы есімі берілген Ұлы ғұлама бабамыз әл - Фарабидің рухани мұраларына арналған. Бұл музей 2013 жылдың 13 сәуір күні университетіміздің Ғылыми кітапханасымен бірге салтанатты түрде өз есігін барша қауымға айқара ашты.
Үшінші - биологиялық мұражай. Ол 1936 жылы биология¬лық факультеттің зоология кафедрасы жанынан зоологиялық мұражай ретінде ашылып, кейін 1949 жылы факультеттің биологиялық мұражайы болып қайта құрылды.
Төртінші - Қазақстанның палеолит мұражайы. 2000 жылы ашылған. Мұражайдың топтамалық ғылыми қоры 600 мыңнан астам артефактіден тұратын палеолит және неолит дәуірлеріндегі тастан жасалған құрал - саймандардың жинағынан құралған.
Бесінші - Қазақстанның көне және ортағасырлық археологиясы мұражайы. Ол 1983 жылы ашылған. Онда қола дәуірінің, ерте темір ғасырының және орта ғасырлардың археологиялық материалдары жинақталған.
Алтыншы - Шығыс мұражайы. Ол 2014 жылдың 16 мамырында шығыстану факультеті қытайтану кафедрасының ұйымдастыруымен университеттің серпінді жобаларды жүзеге асыру бағдарламасы аясында ашылған болатын.
ҚазҰУ мұражайлары тарихи, мәдени, рухани құндылықтарды бойына сіңірген жас мамандарды дайындауда маңызды рөл атқарады.

Әл - Фараби атындағы Қазақ ұлттық университетінің
оқытушылары Тасилова Н. А., Ибрагимова М. Н., Нұртілеуова С. Р.