Шетелдік студенттерге «Қазақстан тарихы мен мәдениеті» және «Елтану» пәндерін оқыту

Шетелдік студенттерге «Қазақстан тарихы мен мәдениеті» және «Елтану» пәндерін оқыту

«Елтану», сондай - ақ «Қазақстан тарихы мен мәдениеті» пәндері шетелдік азаматтарға тілдік және жалпы білім беру дайындығы кафедрасындағы оқу үдерісінің ажырамас бөлігі болып табылады. Кафедра оқытушылары тіл үйренуді (орыс және қазақ тілін) мақсат еткен шетелдік тыңдаушылардың білім алатын елі туралы мүмкіндігінше көбірек білуі қажет деп есептейді. Бұл оқытушының алдында тұрған бірнеше міндеттің жүзеге асуына ықпал етеді. Солардың кейбіріне тоқталып өтейік.
Біріншіден, кеңістікте және уақыт ішінде бағдар алуға байланысты белсенді сөздік қорды кеңейту. Атап айтқанда, грамматика, оқылым, жазылым, сөйлесім, тыңдалым сабақтарында уақыт жетпей қалатын лексикалық қабат жайлы сөз болып отыр. Алайда бұл тілдік материал шетелдіктердің біздің елге алғаш келген кезінен бастап - ақ аса қажет.
Екіншіден, «Елтану», «Қазақстан тарихы мен мәдениеті» пәндері шетелдік азаматтардың жаңа мәдени ортаға сәтті бейімделуінде маңызды рөл атқарады.
Үшіншіден, аталған пәндерден алынған білім тыңдаушылардың жалпы білімдік деңгейін кеңейтіп, тереңдетеді.
Төртіншіден, Қазақстан Республикасының тарихы мен бүгінгі өмірімен танысу барысында студенттердің еліміздің әртүрлі қырларына деген шынайы қызығушылығы арта түсетін жағдайлар жиі кездеседі. Мысалы, Қазақстан аумағында тұратын әртүрлі ұлт өкілдері (корейлер, қытайлар, жапондар және т. б.), сондай - ақ Алматы қаласының тарихы мен мәдениеті жөніндегі деректер мен оқиғалар оларды қызықтырады.
Бесіншіден, студенттер Еуразия құрлығының үлкен аумағын алып жатқан елдің көпұлтты мәдениетіне қызығушылық танытып, оған құрметпен қарай бастайды.
Айта кету керек, «Елтану», «Қазақстан тарихы мен мәдениеті» пәндері бойынша сабақтарда оқытушылар студенттердің ақпаратты қабылдау ерекшеліктерін (келген елінің лингвомәдени ерекшеліктерін) ескере отырып, өзекті мәліметтерді визуализация әдістері арқылы (бейнематериалдар көрсету, қысқаметражды оқу фильмдерін тамашалау және т. б.) белсенді қолданады.
Оқу бағдарламасында оқу экскурсияларының алатын орны ерекше. Олардың атауларының өзі көп нәрсені білдіреді: «Архитектуралық ескерткіштердегі Алматы», «Алматының мәдени орталықтары», «Театрлар қаласы Алматы», «Медеу мен Шымбұлақ – Алматы тауларының інжу - маржандары», «Көктөбе жайлы аңыз бен ақиқат», «Астана – тәуелсіз Қазақстанның астанасы», «Ұлы Отан соғысының қаһармандары – қазақстандықтар», «Түркістан – рухани мәдениеттің орталығы» және басқалар.

Шетелдік студенттерді еліміздің тарихы мен бүгінгі өмірімен таныстыра отырып, оқытушылар БҰҰ - ның ТДМ (Тұрақты даму мақсаттары) құндылықтарын тәжірибе жүзінде іске асырады. Атап айтқанда, елтанулық материал арқылы шетелдік студенттерде «жаһандық азаматтық» дағдыларын дамыту, тұрақты дамуға қол жеткізу мақсатында серіктестік орнату үшін тілдік білім беру негізінде мәдениетаралық диалог қалыптастыру жүзеге асырылады.
Қорытындылай келе, жоғарыда айтылғандардың барлығы Әл - Фараби атындағы Қазақ ұлттық университетінде білім алып жатқан шетелдік студенттердің білім сапасын арттыруға ықпал етеді.

Әл - Фараби атындағы Қазақ ұлттық университеті
шетелдіктердің тілдік және жалпы білім беру
дайындығы кафедрасының оқытушылары
А. Қ. Ахмедова, М. П. Ешимов