Халықаралық ынтымақтастық аясында: тарих пен өнерді байланыстырған рухани кеш

Халықаралық ынтымақтастық аясында: тарих пен өнерді байланыстырған рухани кеш

Әл - Фараби атындағы Қазақ ұлттық университетінің Жоғары оқу орнына дейінгі білім беру факультетінің Шетелдіктердің тілдік және жалпы білім беру дайындығы кафедрасының оқытушылары және шетелдік студенттері халықаралық ынтымақтастық аясында Жамбыл атындағы Қазақ мемлекеттік академиялық филармониясы Алматыдағы Қытай Халық Республикасының Бас консулдығымен бірлесіп, Қытайдың ұлы композиторы Сянь Синхайдың 120 жылдығына арнайы ұйымдастырған іс - шараны тамашалады.
Мерейтой кешінде фотокөрмені аралай жүріп, шетелдік студенттер қазақ пен қытай халықтарының достық қарым - қатынасының көрінісі туралы, Сянь Синхай мен қазақ композиторы Бақытжан Байқадамов арасында берік достық орнағаны жайында, Қытай композиторы Екінші дүниежүзілік соғыс жылдарында Алматыға табан тіреп, Бақытжан Байқадамовпен етене араласқаны туралы өз білімдерін тереңдетті.
Іс - шара ҚР Сыртқы істер министрлігінің Алматы қаласы өкілдігінің басшысы Жәнібек Әбдрашов пен Алматы қаласындағы Қытай Халық Республикасының Бас консулы Цзян Вэй мен филармония директоры Ақан Әбдуалиевтің құттықтау сөзімен басталды.
Мерекелік шара арнайы дайындалған мерекелік концертке ұласты. Кеште Т. Әбдірашев атындағы ҚР Мемлекеттік академиялық симфониялық оркестрінің сүйемелдеуімен Б. Байқадамов атындағы Мемлекеттік хор капелласы және жеке орындаушылар өнер көрсетті. Бағдарламада Сянь Синхайдың «Амангелді» симфониялық поэмасы мен әйгілі «Сары өзен» кантатасы, «Қазақ билері», «Тайханшань тауында» секілді туындылары орындалды.
Халық тарихы мен өнерін қамтитын рухани кештен шетелдік студенттер тамаша әсер алып қайтты. Тарихты, мәдениетті, өнерді құрметтеуге тәрбиелеуде мерейлік кештің берері мол болды.

А. Е. Саденова.
Әл - Фараби атындағы ҚазҰУ,
Жоғары оқу орнына дейінгі білім беру факультеті,
Шетелдіктердің тілдік және жалпы білім беру
дайындығы кафедрасы