Сапалы білім – болашақ кілті

Сапалы білім – болашақ кілті

Барлық саланың қарыштап дамып, өркендеп өсуі білім мен ғылымның даму қарқынына байланысты екендігі сөзсіз, яғни маңызды дүниелердің бірі – білімнің салтанат құруы. Білім, тәлім мен тәрбие мәселесі – қоғамымыздың болашағы болып табылады.
Кәсіби әрі шебер білім беруде жоғары деңгейде аянбай еңбек етіп келе жатқан орта, қазақтың қара шаңырағы – әл - Фараби атындағы Қазақ ұлттық университеті білім әлемінде желкен керіп келеді. Қазақстандағы шоқтығы биік білім ордасы жылдан жылға өз өрісін кеңейтіп, ұлғайып, елімізге білімді әрі жаңа заман мамандарын даярлап, еліміздің еңселі болуына үлесін қосып жатқан оқу орны.
Әл - Фараби атындағы ҚазҰУ заманауи оқу бағдарламалары мен жоғары білікті оқытушылар құрамының арқасында қамтамасыз етілетін білім берудің жоғары деңгейімен танымал. Мұнда көрнекті ғалымдар, халықаралық марапаттардың иегерлері жұмыс істейді және оқу жоспарлары жаһандық еңбек нарығының талаптарына бейімделген. Бұл түлектерге халықаралық аренада бәсекеге қабілетті болуға мүмкіндік береді.
Әл - Фараби атындағы ҚазҰУ - дың ғылыми қызметі ерекше назар аударуға лайық. Университет нанотехнология, биотехнология, тұрақты даму және ақпараттық технологиялар сияқты салаларда зерттеулермен белсенді айналысады. Көптеген жұмыстар беделді халықаралық журналдарда жарияланады, ал университет Қазақстандағы ғылыми жетістіктер саны бойынша жетекші орынға ие. ҚазҰУ сонымен қатар студенттерді адамгершілік пен әлеуметтік жауапкершілік деңгейі жоғары тұлға ретінде тәрбиелеуге баса назар аударады.
Әл - Фараби атындағы ҚазҰУ - де дәрістер мен семинарлар студенттердің академиялық және кәсіби дамуына бағытталған оқу процесінің маңызды бөлігі болып табылады. ҚазҰУ университетінде дәрістерді өз саласының эксперттері, білікті оқытушылар жүргізеді.
Әл - Фараби атындағы Қазақ ұлттық университетінде «Ақпараттық технологиялар» мамандығының магистранттары ретінде педагогикалық тәжірибеден өттік. Тәжірибе барысында бакалавриат деңгейіндегі студенттерге «Машиналық оқытуға кіріспе» пәні бойынша сабақ беруге қатысып, оқытушының күнделікті қызметінің қыр - сырымен таныстық. IT саласындағы студенттермен жұмыс істеу – заман талабына сай терең білім мен жан - жақты дайындықты қажет етеді. Болашақтағы жетістіктеріміз бен мүмкіндіктеріміз IT саласының дамуымен тығыз байланысты. Технологиялар мен инновациялар бізді жаңа әлемге, шексіз мүмкіндіктерге жол ашады. Сол себепті өз сабақтарымызда теориялық материалды заманауи мысалдармен байланыстырып, практикада интерактивті әдістерді қолдануға тырыстық. Бұл тәжірибе аудиториямен тиімді байланыс орнату, материалды құрылымдап жеткізу, әртүрлі білім деңгейіндегі студенттермен жұмыс жасау сияқты маңызды дағдыларды дамытуға мүмкіндік берді.
Қорытындылай келе, Ақпараттық технологиялар саласындағы білімдердің негіздерін, нәтижелі және әдістерін жоғары білікті мамандарға меңгерту мақсатында ұстаздар нәтижелі еңбек етуде. Жастар білімнің бастауын осы ұстаздардан алып, биік белестерге көтерілуде.

Жасұзақ Мұхтар Сакенұлы
Компьютерлік ғылымдар кафедрасының оқытушысы.

Өзенбек Ерсұлтан Рахымжанұлы., Арапова Жанерке Елдосқызы., Балғалиев Азат Батырғалиұлы
«Ақпараттық технологиялар» мамандығының 1 курс магистранттары.

Компьютерлік ғылымдар кафедрасы
Әл - Фараби атындағы Қазақ ұлттық университеті