Әйелмен әлем әдемі

Әйелмен әлем әдемі

Қазақстанда 8 наурыз ерекше атап өтіледі. Бұл күні әйелдерге құрмет көрсетіліп, түрлі іс - шаралар мен мерекелік бағдарламалар ұйымдастырылады. Мектептер мен университеттерде, жұмыс орындарында әйелдерге гүлдер мен сыйлықтар беріледі, ал ер азаматтар жақындарына, әріптестеріне алғыс білдіріп, осы күнді мерекелейді.
Бүгінде 8 наурыз әйелдердің тек мерекесі ғана емес, сонымен қатар оларды қолдау мен құрметтеу күні болып табылады. Бұл күннің мағынасы әйелдердің еңбекқорлығы мен қайсарлығын, сұлулығын және мейірімділігін бағалау болып қала береді.
Әл - Фараби атындағы Қазақ ұлттық университетінде 8 наурыз – Халықаралық әйелдер күні мерекесі жыл сайын ерекше салтанатпен атап өтіледі. Бұл күні университеттің барлық факультеттері мен бөлімдерінде нәзік жанды аруларға құрмет көрсетіліп, олардың қоғамдағы рөлі мен еңбектері жоғары бағаланады.
Әл - Фараби атындағы Қазақ ұлттық университетінде биыл да 8 наурыз – Халықаралық әйелдер күніне орай ерекше салтанатты шара өтті. «Әйелмен әлем әдемі» атты бұл мерекелік кеш нәзік жанды аруларға деген ыстық ықылас пен құрметке толы болды.
Салтанатты жиында университет ректоры оқу орнының гүлдей жайнаған аруларын, ардақты ұстаздары мен қызметкерлерін құттықтап, олардың білім мен ғылымға қосқан үлесіне алғыс білдірді. Ұзақ жылдарын ұстаздыққа арнаған жанашыр жандарға арнайы марапаттар табысталып, олардың еңбегі лайықты бағаланды.
Мерекелік кештің сәнін ер азаматтардың жылы лебіздері мен әсерлі өнері аша түсті. Әр факультеттің жігіттері жүрек тебірентер әндер шырқап, жыр жолдарын арнап, нәзік жандарға құрметін білдірді. Кеш бойы көтеріңкі көңіл - күй, қуанышты жүздер мен шынайы алғыстар мерекенің шырайын арттыра түсті.
Әйел – өмірдің шырайы, сұлулық пен мейірімнің символы. Осындай мерекелік сәттер олардың қоғамдағы рөлінің маңыздылығын тағы бір мәрте айшықтай түсті.

Шетелдіктердің тілдік және жалпы білім беру
дайындығы кафедрасының оқытушылары
Г. Ә. Мұсаева, М. П. Ешимов