Тәуелсіз елдің таңы – құт

Тәуелсіз елдің таңы – құт

Жалғасып соғыс өрті сан ғасырға,
Біз көрдік қас дұшпанның балтасын да...
Еліме тәуелсіздік келіп жетті
Мыңжылдық күрестердің арқасында!

Жаңғырды халқымыздың мың өшкені,
Бар мұнда сан ұрпақтың үлестері.
Ел үшін мәңгілікке жалғасады
Ақыл-Ой, Ар-Намыстың күрестері.

Дауылға қарсы тұрған қайыңдай бір,
Өр елім, жас болсаң да айбының дүр!
Нарықтың қиындығын өзіңе артып,
Біреулер ақ-қараны айырмай жүр.

Еліме күрестерде бақ дарып шын,
Кеткен жоқ қонған бағы қолдан ұшып.
Туғаннан Тәуелсіздік тайсалмастан
Келеді Нарықпенен арпалысып!

Тойланып мың мереке, ұлыс күні,
Құйылған шаңырақтан ырыс нұры.
Халқымның бақыты үшін аз байлық па
Тәуелсіз еліміздің тыныштығы?!

Ішкі жау балағыңнан қаппасын кеп,
Сыртқы жау пәле-жала жаппасын тек.
Мен әркез отырамын Тәуелсіздік
Қадірін білмегеннен сақтасын деп!

Намысың найзағайдай жарқылдап бір,
Өр халқым, дүниеге даңқыңды асыр!
Дәуірдің бастау алған Жиырма бірі –
Еліме болсын дәйім Алтын ғасыр!

Ешкім де көзіне ілмес ноқталыны,
Ешқашан ондай ұлттың жоқ тамыры!
Бабалар аңсап өткен кезге жеттік,
Қолдасын көк туымды хақ Тәңірі!

Айбатыр Сейтақ,
ақын, Қазақстан Жазушылар және Журналистер одағының мүшесі.