Тіл – татулық тірегі

Тіл – татулық тірегі

Жуырда әл - Фараби атындағы Қазақ ұлттық университетінің жоғары оқу орнына дейінгі білім беру факультеті шетелдік студенттерге «Тіл – татулық тірегі» тақырыбында дөңгелек үстел өткізді. Дөңгелек үстел басына оқытушылар мен дүние жүзінен келіп, білім алып жүрген шетелдік студенттер жиналды.
Дөңгелек үстел жұмысында модератор міндетін атқарған оқытушы Т. В. Курманова дөңгелек үстел басына жиналған қауымға қазақ тілі жайында ой - толғамдарын жеткізе отырып, келелі ойларымен бөлісті. Ол өз баяндамасында қазақ тілінің білімі мен әдебиеттану ғылымдарының негізін салушы, ағартушы, Ахмет Байтұрсынұлы туралы айтты. Сонымен қатар, Қазақстан елінде түрлі ұлттар мен ұлыстар өмір сүретінін, олардың әрқайсысының ана тілінің басқа халықтар тіліне қатысты тағдыры бар екенін, тіл арқылы адамдар бір - бірін танып біле алатынын және кез - келген халықтың рухани мәдениетімен, дәстүрлерімен, салттарымен танысу үшін де тілге жүгінетінін атап өтіп, жастарды пікірлесуге шақырды.
Дөңгелек үстелде ары қарай сөз алған оқытушы М. Азнабакиева «Қазақ тілі пәнінің» оқытылу барысы, қазіргі уақытта мемлекеттік тілді кәсіби тұрғыда меңгертудің өзектілігі жайлы сөз етіп, Ана тілімізді қадірлеу баршамызға парыз болып саналатынын жеткізді.
Аталмыш шара қазақ тілінің бүгіні мен болашағы және әр тілдің бірегейлігі мен өзгешілігін ашуға бағытталды. Дөңгелек үстелде мемлекеттік тіл туралы оралымды ой тасталып, тұшымды пікірлер айтылды.
Дөңгелек үстел барысында шетелдік студенттер бейнетаспа арқылы Қазақстан Республикасында тұратын әр түрлі ұлттардың мәдениетімен таныса отырып, Қазақстанды жаңа қырынан таныды. Ең маңыздысы – шетелдік студенттер Қазақстанда әр түрлі ұлтты халықтар бірлікте, бейбітшілікте, тыныштықта өмір сүріп жатқандарын тамашалай алды. Сонымен қатар, студенттер көптеген сұрақтар қойды.
«Тіл – татулық тірегі» атты дөңгелек үстел мәдени диалог түрінде шетелдік студенттердің өздерінің белсенді қатысуымен жоғары деңгейде өтті, сонымен қатар студенттерді Қазақстанның тілін, тарихын және мәдениетін құрметтеуге үйретуде өз үлесін қосты деп санауға болады.

А. Е. Саденова, М. Азнабакиева, Т. В. Курманова.
Әл - Фараби атындағы Қазақ ұлттық университеті
Жоғары оқу орнына дейінгі білім беру
факультетінің оқытушылары