Қасым - Жомарт Тоқаев жаңадан тағайындалған шетелдік елшілермен кездесті

Қасым - Жомарт Тоқаев жаңадан тағайындалған шетелдік елшілермен кездесті

Жаңадан тағайындалған бірқатар мемлекеттердің төтенше және өкілетті елшілері Қазақстан Президентіне сенім грамоталарын тапсыру рәсімін өткізді, деп Ақорданың баспасөз қызметі хабарлады.
Мемлекет басшысына Сенім грамоталарын Бразилия Федеративтік Республикасының елшілері - Рубем Антонио Корреа Барбоза, Оман сұлтанаты - Мұхаммед бен Абдулла бин Салих әл - Бахрани және Корея Республикасының - Ку Хонг Сок тапсырды.
Қасым - Жомарт Тоқаев елшілерді Қазақстандағы дипломатиялық жұмыстың басталуымен құттықтап, оларға сәттілік тіледі.
«Қазақстан сіздің елдеріңізбен өте жақсы қарым - қатынаста. Осы мүмкіндікті пайдаланып, сіздердің елдеріңіздің басшыларына сәлем жолдаймын. Сіздер Қазақстанмен қатынастарды одан әрі дамытуға өз үлестеріңізді қоса аласыздар деп үміттенемін. Сіз бүкіл әлем пандемиядан зардап шегіп жатқан қиын уақытта келдіңіз. Қазақстан осы қауіпті ауруды жеңу үшін дер кезінде шешім қабылдады. Бұл оңай емес, бірақ біз халықаралық ынтымақтастыққа сенім артамыз, БҰҰ - ның күш - жігерін қолдаймыз және барлық елдер бұл ауруды бірге жеңеді деп сенеміз», - деді Президент.
Қазақстан тәуелсіздік жылдары халықаралық аренада өз ұстанымын нығайтып, бейбітшіл және ашық мемлекет, жаһандық және өңірлік істерде сенімді әріптес ретінде орнықты. Қазақстан көпвекторлы, сындарлы және белсенді сыртқы саясатты жүзеге асыруда, қауіпсіздік, ынтымақтастық және даму салаларында жаһандық және өңірлік күн тәртібін қалыптастыру мен іске асыруда елеулі үлес қосуда.
Қазақстан өз ұлттық мүдделерді барынша және мызғымастықпен қорғауға, сыртқы саяси және сыртқы экономикалық басымдықтарды сындарлы түрде ілгерілетуге басты назар аударылады.
Саяси және экономикалық ықпал, халықаралық нарықтар мен инвестициялық ағындар үшін мемлекетаралық бәсекелестіктің күшеюі аясында Қазақстан өзіне әлемдік қоғамдастықтың жауапты мүшесі, Еуразия құрлығының геосаяси және геоэкономикалық орналасу жүйесінің негізгі элементі, Орталық Азия өңіріндегі көшбасшы мемлекет мәртебесін бекітуге күш салып жатыр.

Керімсал Жұбатқанов, Қазақ - Орыс халықаралық университетінің доценті, тарих ғылымдарының кандидаты