Білім кеңістігіндегі Қазақстан – Жапония ынтымақтастығы

Білім кеңістігіндегі Қазақстан – Жапония ынтымақтастығы

Әл - Фараби атындағы Қазақ ұлттық университеті – білім мен ғылымды ғана емес, түрлі елдер мен мәдениеттерді байланыстыратын халықаралық білім ордасы. Университеттің халықаралық ынтымақтастығы аясында Жапония жоғары оқу орындарымен қалыптасқан әріптестік қарым - қатынастың маңызы ерекше.
Бүгінде ҚазҰУ - дың Жоғары оқу орнына дейінгі білім беру факультетінде Жапониядан келген студенттер білім алып, қазақ және орыс тілдерін меңгеріп жатыр. Шетелдіктердің тілдік және жалпы білім беру дайындығы кафедрасында олар тіл үйренумен қатар, Қазақстанның тарихы, мәдениеті, салт - дәстүрі және ұлттық құндылықтарымен танысады.
Жапон студенттері үшін қазақ және орыс тілдерін меңгеру – жаңа тілдік дағдыларды қалыптастырумен қатар, Қазақстанның қоғамдық және мәдени ортасына жақындаудың маңызды мүмкіндігі. Сабақ барысында заманауи оқыту әдістері, цифрлық технологиялар мен практикалық тапсырмалар кеңінен қолданылады. Студенттер алған білімдерін күнделікті қарым - қатынаста қолдануға, қазақ және орыс тілдерінде еркін сөйлесуге ұмтылады.
Жапон жастарының білімге деген қызығушылығы мен еңбекқорлығы оқу үдерісінен анық байқалады. Олар сабақтарға белсенді қатысып, университетте ұйымдастырылатын мәдени - танымдық іс - шараларға да ықыласпен атсалысады. Қазақ тіліндегі әндерді орындау, домбыра үйрену, ұлттық мерекелер мен мәдени кездесулерге қатысу арқылы олар қазақ халқының дәстүрі мен рухани құндылықтарын жақынырақ танып келеді.
Тіл – халықтар арасындағы өзара түсіністіктің маңызды құралы. Осы тұрғыдан алғанда, ҚазҰУ - да білім алып жатқан жапон студенттерінің қазақ және орыс тілдерін үйренуі Қазақстан мен Жапония арасындағы мәдени және білім беру байланыстарын нығайтуға өзіндік үлес қосуда.
ҚазҰУ - дың Жапонияның жоғары оқу орындарымен әріптестігі студенттер алмасуына, академиялық тәжірибе жинақтауға және екі ел жастарының өзара байланысын дамытуға жаңа мүмкіндіктер береді. Мұндай білім беру байланыстары жастардың дүниетанымын кеңейтіп, халықаралық ортада еркін әрекет етуіне жол ашады.
Бүгінде дайындық факультетінде білім алып жатқан жапон студенттері – екі ел арасындағы достық пен өзара түсіністіктің жарқын көрінісі. Олардың қазақ және орыс тілдерін үйренуге деген қызығушылығы Қазақстанның білім беру кеңістігіне деген халықаралық сұраныстың да бір көрінісі.
Білім мен тіл – елдерді жақындастыратын берік көпір. Ал сол көпірдің берік болуы – жастардың өзара түсіністігі мен ортақ білім кеңістігін қалыптастырудан басталады.

Саденова А. Е.
Әл - Фараби атындағы Қазақ ұлттық университеті
Жоғары оқу орнына дейінгі білім беру факультеті
Шетелдіктердің тілдік және жалпы білім беру дайындығы кафедрасының қауымдастырылған профессоры