Денсаулықты нығайту – өмір сапасын арттыру

Денсаулықты нығайту – өмір сапасын арттыру

Денсаулық – адам өміріндегі ең басты әрі баға жетпес құндылық. Дені сау адам ғана өз мүмкіндігін толық жүзеге асырып, сапалы білім алып, қоғамның дамуына өз үлесін қоса алады. Сондықтан салауатты өмір салтын қалыптастыру – әр адамның өз денсаулығына деген жауапкершілігінен басталатын маңызды қадам.
Осы бағыттағы құндылықтарды жастардың бойына сіңіру – білім беру ұйымдарының басты міндеттерінің бірі. Әл - Фараби атындағы Қазақ ұлттық университетінің Жоғары оқу орнына дейінгі білім беру факультетінің Шетелдіктердің тілдік және жалпы білім беру дайындығы кафедрасында білім алушылардың жан - жақты дамуына, денсаулығын сақтауға және салауатты өмір салтын қалыптастыруға ерекше көңіл бөлінеді.
Кафедрада шетелдік студенттерге арналған «Денсаулық – ең басты құндылық», «Салауатты өмір салты», «Тазалық – денсаулық кепілі» сияқты тақырыптарда рухани - танымдық және тәрбиелік іс - шаралар, кураторлық сағаттар тұрақты түрде ұйымдастырылады. Мұндай кездесулер барысында дұрыс тамақтану, жеке бас гигиенасы, дене белсенділігі, аурулардың алдын алу және қоршаған ортаның тазалығын сақтау мәселелері кеңінен талқыланады.
Аталған іс - шаралардың басты ерекшелігі – студенттердің тек ақпарат алып қана қоймай, өз денсаулығына саналы түрде қарауына ықпал етуі. Ашық пікірталас пен еркін пікір алмасу форматында өтетін кураторлық сағаттар білім алушылардың денсаулық мәдениетін арттырып, өз өмір салтына жауапкершілікпен қарауына мүмкіндік береді. Сонымен қатар мұндай кездесулер әртүрлі мәдениет өкілдерінің өзара түсіністігін нығайтып, мәдениетаралық қарым - қатынасты дамытуға да өз үлесін қосады.
Факультетте студенттердің физикалық, психологиялық және әлеуметтік әл - ауқатын қолдауға бағытталған жұмыстар жүйелі түрде жүргізіледі. Дұрыс тамақтану мәдениетін қалыптастыру, спорттық және дене шынықтыру іс - шараларын ұйымдастыру, бос уақытты тиімді өткізуге жағдай жасау – осы бағыттағы маңызды жұмыстардың қатарында.
Салауатты өмір салтының ажырамас бөлігі – зиянды әдеттердің алдын алу. Осы мақсатта студенттер арасында темекі шегудің, алкогольдік ішімдіктер мен басқа да зиянды заттардың адам ағзасына тигізетін кері әсері туралы ақпараттық - түсіндіру жұмыстары жүргізіледі. Сонымен бірге жастарды белсенді өмір салтына, спортпен шұғылдануға, дұрыс күн тәртібін сақтауға және өз денсаулығына ұқыпты қарауға ынталандыруға басымдық беріледі.
Шетелдік студенттердің спортқа деген қызығушылығы да жоғары. Спортпен айналысу – денені шынықтырумен қатар, адамның эмоционалдық жағдайын жақсартуға, сергектігін арттыруға және ұжымдық қарым - қатынасты нығайтуға мүмкіндік беретін тиімді құрал. Осы орайда студенттердің бос уақытын мазмұнды ұйымдастырып, олардың спорттық және қоғамдық белсенділігін арттырудың маңызы зор.
Салауатты өмір салтын қалыптастыру – бір реттік іс - шарамен шектелмейтін, күнделікті өмір салтына айналуы тиіс маңызды мәдениет. Таза қоршаған орта, дұрыс тамақтану, жеткілікті дене белсенділігі, жеке гигиена, тиімді күн тәртібі және психологиялық саулық – адамның өмір сапасын айқындайтын негізгі факторлар.
Бүгінде кафедрада жүргізіліп жатқан тәрбиелік және танымдық жұмыстар шетелдік студенттердің денсаулық туралы түсінігін кеңейтіп қана қоймай, олардың өз өміріне жауапкершілікпен қарауына, бос уақытын тиімді пайдалануына және салауатты әдеттерді қалыптастыруына ықпал етуде.
Денсаулық – табиғаттың адамға берген ең үлкен сыйы. Оны сақтау – әрқайсымыздың қолымызда. Салауатты ұрпақ – жарқын болашақтың негізі. Сондықтан денсаулықты нығайтуға бағытталған әрбір игі қадам білімді, белсенді, жауапты және өмірге құштар жастардың қалыптасуына қызмет етеді.

Саденова Айгүл
Әл - Фараби атындағы ҚазҰУ
Жоғары оқу орнына дейінгі білім беру факультеті
Шетелдіктердің тілдік және жалпы білім беру дайындығы кафедрасы