Ақын рухына арналған жыр кеші

Ақын рухына арналған жыр кеші

Әл - Фараби атындағы Қазақ ұлттық университетінің жоғары оқу орнына дейінгі білім беру факультетінің «Асыл сөз» стартабының ұйымдастыруымен қазақ поэзиясының көрнекті өкілі М. Мақатаевтың туғанына 95 жылдық мерейтойына арналған «Жыр әлемі» атты поэзия кеші болып өтті. Мақсат: қазақ руханиятының жарқын өкілі М. Мақатаевтың жырлары арқылы жастардың бойына патриоттық сезімдерін қалыптастыру, Отанға, туған өлкеге, ана тіліне, ұлттық құндылықтарына деген сүйіспеншілігін арттыру, бірлікте, ынтымақта болуға тәрбиелеу.

Біздің факультетіміз шетелдік азаматтарға білім беретін болғандықтан онда ақынның өмірі мен шығармашылығы туралы мәліметтерді алғаш естіп, жырларымен енді танысқан жастардың қарасы көп болды. Бірақ, ақынның жырларын жастайынан естіп, жаттап өскен қара көз жастарымыздың да қарасы баршылық екен. Жыр кеші жоғары деңгейде өтті, ақынның өлеңдерін нақышына келтіріп оқыған шәкірттер тыңдармандарға ерекше әсерлі кеш сыйлады.

Музыка жүрек тілі, ол сезімдер мен көңіл күй әлемі. Мұқағали ақынның жырларына жазылған әндер халықтың жүрегінен әлдеқашан орын алған сазды әуендер. Осы кеште жыр арқылы жан сырын ақтарған, өлең арқылы ұлт рухын асқақтатқан ұлы ақынға деген ізет пен тағзымның көрінісі болды. Бұл жүректен жүрекке жол тартқан поэзия мерекесіне ұласты. Бұл кештің ерекшелігі ақынның жырлары оқылып, әндері әуелеген кезде суретші жастарымыз көрермендердің алдында ақынның портретін салып, кеш соңына дейін тамаша сурет туындыларын ұсынды.

Бұл ақынның жырларына деген сүйіспеншілік арқылы ел руханиятын асқақтатқан кеш болды. М. Мақатаевтың 95 жылдық мерейтоына арналған «Жыр әлемі» атты поэзия кешінде тілге деген құрмет қана емес, ұлтқа деген мақтаныш сезімін сезіндік. М. Мақатаевтың жалынды жырлары халқымыздың рухани мұрасына қосылған үлкен олжа, жас ұрпаққа қалдырылған қасиетті қазына. Мұқағали ақынның есімін бұрыннан білетін жыр сүйер қауыммен бірге осы шараның арқасында ақынның есімін алғаш естіп, оның шығармаларымен енді танысып жатқан жастар да бар еді. Бұл біздің мақсатымыздың орындалғаны деп білеміз. Мұқағали атамыздың жырлары жасай берсін!

Жоғары оқу орнына дейінгі білім беру факультетінің аға оқытушылары: Ж. С. Әділханова, С. Нұртілеуова