Нашақорлықтың әлеуметтік - экономикалық және отбасына тигізетін зардаптары

Нашақорлықтың әлеуметтік - экономикалық және отбасына тигізетін зардаптары

Әл - Фараби атындағы Қазақ ұлттық университеті жоғары оқу орнына дейінгі білім беру факультетінің жоғары оқу орнына дейінгі дайындық кафедрасында https://farabi. university тыңдаушыларына "Нашақорлықтың әлеуметтік - экономикалық және отбасына тигізетін зардаптары" тақырыбында тәрбие сағаты өткізілді.
Тәрбие сағатының мақсаты – тыңдаушыларға нашақорлықтың адам өміріне, денсаулығына, отбасына және қоғамға тигізетін зиянын түсіндіру, есірткіге қарсы көзқарас қалыптастыру, салауатты өмір салтын ұстануға баулу және зиянды әдеттерден аулақ болуға үндеп, өмірлік құндылықтарды дәріптеу.
Іс - шара барысында нашақорлықтың әлеуметтік - экономикалық салдары, құқықтық және медициналық аспектілері талқыланып, бейнероликтер көрсетілді. Тыңдаушылар пікір білдіріп, өз ойларымен бөлісті. Шара жастардың өмірге деген жауапкершілігін арттырып, саналы таңдау жасауға үндеді.
Нашақорлықтың әлеуметтік - экономикалық және отбасына тигізетін зардаптары
Нашақорлық – бір адамның ғана емес, тұтас қоғамның жүйкесін үзіп, шаңырақтың шаттығын шайқалтып, елдің экономикалық қуатын әлсірететін ең қауіпті әлеуметтік дерттердің бірі. Бұл – көрінбейтін, бірақ күн сайын қанша тағдырды құртып жатқан дерт.
Әлеуметтік - экономикалық зардаптары:
Нашақорлық көбейген сайын қоғамдағы еңбекке қабілетті жастың саны азаяды. Білім алуға, біліктенуге, жұмыс істеуге бейімі төмендейді. Нәтижесінде өндіріс те, кәсіп те, қызмет те зардап шегеді. Мемлекет есірткіге қарсы күрес пен емдеу шараларына орасан қаражат жұмсайды. Бұл – денсаулық сақтау жүйесіне, құқық қорғау саласына, профилактикалық жұмыстарға кететін қосымша шығындар.
Есірткіге тәуелді адамның жұмысқа қабілеті төмендеп, еңбек өнімділігі әлсірейді. Көбінің ресми табысы болмайды, сондықтан көлеңкелі экономикаға, қылмысқа тартылу қаупі жоғары. Ал қылмыс – қоғамдағы қауіпсіздікті бұзып қана қоймай, экономикалық тұрақтылыққа да елеулі нұқсан келтіреді.
Отбасыға тигізетін зардаптары
Ең ауыр соққыны нашақордың өз отбасы сезінеді. Есірткінің кесірінен адам мінезі өзгеріп, жауапкершілік жойылады, сенім жоғалады. Үй ішінің тыныштығы бұзылады, кикілжің көбейеді.
Көп жағдайда отбасындағы қаражат емге емес, есірткіге жұмсалып, материалдық тапшылық пайда болады. Бала тәрбиесі назардан тыс қалады. Есірткіні қолданатын ата - ананың балалары психологиялық тұрғыдан әлсіз, күйзеліске бейім болып өседі. Тіпті мұндай ортаның өзі келесі ұрпаққа қауіп төндіреді – бұл «әлеуметтік мұраға» айналатын қиындық.
Ал ата - анасы есірткі қолданатын үйде бала қорқыныш, тұрақсыздық, сенімсіздік күйінде өседі. Мұндай жерде мейірім де, жылулық та жетіспейді. Сондықтан нашақорлық тек бір адамды емес, бір шаңырақты, тіпті бір әулетті күйретуі мүмкін.

Әл - Фараби атындағы ҚазҰУ https://farabi. university
Жоғары оқу орнына дейінгі білім беру факультетінің
аға оқытушысы: Нұртілеуова С. Р.