Шетелдік студенттер «Алғыс айту күні» мерекесін атап өтті

Шетелдік студенттер «Алғыс айту күні» мерекесін атап өтті
Әл - Фараби атындағы Қазақ ұлттық университетінің жоғары оқу орнына дейінгі білім беру факультетінде шетелдіктердің тілдік және жалпы білім беру дайындығы кафедрасында жақында Қытай, Корея, Жапония, АҚШ, Түркия елдерінен келген 14 орыс тобы кураторы А. Е. Саденовамен бирге ғылыми - танымдық, тәрбиелік маңызы бар «Алғыс айту күні» атты ашық тәрбиелік іс - шарасын өткізді.
Бұл іс - шараның мақсаты «1 наурыз – Алғыс айту күні» мерекесінің мәні туралы түсінік беру және ризашылық пен алғыс, сыйластық құндылығы туралы түсініктерін кеңейту, сыпайылық қарым - қатынасын дамыту, қасиетті рухани құндылықтарды шетелдік азаматтарға кеңінен таныстыру болды.
Іс - шара барысында баяндамалар жасалды, «Алғыс айту күні» – тағдыр тәлкегімен Қазақстанға қоныс аударған түрлі этнос өкілдерін қазақ халқы құшақ жая қарсы алып, басқа түскен ауыртпашылықты бірге көтеріп, қолдау көрсетіп, қорған болғаны үшін қазақ халқына алғыс білдіретіні туралы сөз етіп, сонымен қатар, «Алғыс айту күнін» тарихқа тағзым ету деп түсінуге де болатынын және ешуақытта қазақ халқының қамқорлығының ұмытылмайтынын әрі қиын - қыстау кезеңде қазақ халқының көрсеткен қамқорлығы мен мейірімі өзгеге үлгі болатынын мақтанышпен жеткізді.
Іс - шара барысында студенттер сұрақ - жауап интелектуалды ойын - сайысына қатысты. «Алғыс айту күні» мерекесі туралы көрме ұйымдастырылып, қазақ елінің тарихы, салт - дәстүрі, ұлттық нақышы, киімі, тағамы мен мәдениеті, өнері таныстырылды. Іс - шара музыкалық - поэтикалық кешпен жалғасын тапты. Бұл кеште студенттер дайындаған қойылымдарын көрсетті. Кеш барысында орыс, қазақ тілдерінде өлеңдер оқылып, әндер орындалды.
Іс - шара арқылы шетелдік студенттер «1 наурыз – Алғыс айту күні» мерекесі, қазақ елінің мәдениеті, әдет - ғұрпы, тарихы туралы жаңа мағлұматтармен таныс болды.
Шетелдік студенттер танымдық - мәдени іс - шараларға қатысу арқылы осы факультетте тек қана білім алып қана қоймай, мәдени іс - шараларға да араласып, мәдени, рухани өсуге болатынына көз жеткізіп отырады.

А. Саденова
Әл - Фараби атындағы Қазақ ұлттық университеті
Жоғары оқу орнына дейінгі білім беру факультеті
Шетелдіктердің тілдік және жалпы білім
беру дайындығы кафедрасы