35 жылдық мерейтойға орай өткізілген ашық есік күні

35 жылдық мерейтойға орай өткізілген ашық есік күні
Қара шаңырақ саналатын әл - Фараби атындағы Қазақ ұлттық университеті, жоғары оқу орнына дейінгі білім беру факультеті шетелдіктердің тілдік және жалпы білім беру дайындығы кафедрасының ұйымдастыруымен «Ашық есік күні» онлайн форматта болып өтті. Кафедраның мерейтойымен қатар өткізілген ашық есік күніне шетелдіктердің тілдік және жалпы білім беру дайындығы кафедрасының оқытушылары мен Қытай, Оңтүстік Корея, Жапония, Түркия, Ауғанстан, Сирия, Түрікменстан және басқа да елдерден шетелдік студенттер қатысты. Сондай - ақ, бұл аталған мазмұнды шараның өтуіне орай ҚазҰУ - нің Бірінші проректоры М. Бүркітбаев, Алматыдағы Қытай Халық Республикасы Бас консулдығының ғылым және техника жөніндегі консулы Ми Гуйсюн, түрікмен орталығының төрағасы Г. А. Аннакулиева, Мажарстан Бас консулдығының сауда - экономикалық қатынастар жөніндегі кеңесшісі Дердь Тар, Ланчжоу университеті шет тілдер кафедрасының өкілдері және тағы да басқа елдердің арнайы өкілдері онлайн байланысқа шығып, жүрекжарды тілектерін жолдады.
Алғашқылардың бірі болып университеттің Бірінші проректоры М. М. Бүркітбаев мырза сөз сөйледі. Ол кафедраның құрылу тарихына тоқтала келе, тілдерді оқыту бойынша кеңес одағы кезінен бастап тілді шет тілі ретінде оқытатын теңдесі жоқ кафедра екенін баса айтты. Екінші болып сөз сөйлеген Алматыдағы Қытай Халық Республикасы Бас консулдығының ғылым және техника жөніндегі консулы Ми Гуйсюн қазақ және орыс тілдерін қытай өкілдеріне тиісті деңгейде үйретіп, тәрбие беріп жатқандығына алғыс білдіріп, алдағы уақытта да бірлесе еңбек етіп, тіл үйрету бағытындағы жұмыс жалғасын табады деген үмітте екенін жеткізді. Сонымен қоса кафедрада бірнеше жыл бұрын оқып кеткен, факультет түлектері, соған қоса Мәскеу лингвистика университетінің түлектері кафедраны мерейтойымен құттықтаған қазақ тіліндегі виедожолдауларын жіберді. Және де онлайн мерекелік шараға кафедраның құрылған жылдарынан бастап жұмыс істеген, қазіргі кезде құрметті демалыста отырған ардагерлер де құрметті қонақ ретінде қатысты.
Шетелдіктердің тілдік және жалпы білім беру дайындығы кафедрасының меңгерушісі, профессор А. Е. Саденова мерейтойға байланысты ұйымдастырылған шараға онлайн форматта қатысқан арнайы қонақтар мен шетелдік студенттерге кафедра ұжымы атынан алғыс білдіре отырып, факультет пен кафедра тарихына, оның жұмысына тоқталып өтіп, қазақ және орыс тілдерін шет тілі ретінде меңгертуде аталмыш кафедраның Республикадағы алдыңғы қатардағы кафедра екенін тілге тиек етіп, оның білім беру саласындағы жетістіктері жайлы айтып өтті. Сөз соңында кафедра меңгерушісі қазақ және орыс тілдерін үйрену үшін Жоғары оқу орнына дейінгі білім беру факультетіне келіп, білім алуға шақырды.
Мерекелік шара кафедра оқытушылары мен шетелдік тыңдаушылардың қатысуымен арнайы дайындалған мерекелік концертке ұласты. Концертте қазақ және орыс тілдерін меңгеріп жатқан тыңдаушылар өздері аталмыш шараға арнайы дайындаған өнерлерін көрермендер назарына ұсынды. Ал факультетте қазақ тілін меңгеріп жатқан Оңтүстік Кореялық тыңдаушылар «Сағындым Алматымды» әнін тамылжыта, нақышына келтіре орындап, көрермен қошеметіне ие болды. Оқытушылар мен студенттердің дайындаған концерттік нөмірлері қалың жұртшылықтың көңілінен шықты. Мерекелік кеш соңында жүргізушілер онлайн форматта өткен мерекелік іс - шараны ұйымдастырған оқытушылар мен тыңдаушыларға, сонымен бірге Skype платформасында онлайн өткен жиынға қатысып, тілек білдірген кеш қонақтарына ризашылығын білдірді.

М. П. Ешимов, Г. Ә. Мұсаева, Р. И. Дүйсенбаева
Шетелдіктердің тілдік және жалпы
білім беру дайындығы кафедрасы