Жақынынан айырылған адам білуі керек алты нәрсе

Пайдалы кеңес
Жақынынан айырылған адам білуі керек алты нәрсе
Бірінші, Барлық нәрсе - жалғыз, серігі жоқ Алланың әмірімен, қалауымен, тағдырымен болады.
Алла бір нәрсенің болуын қаласа, оған тек "Бол" дейді. Сонда ол бола қалады. Ал бір нәрседен сақтаса, оны ешкім де, ешқандай күш те өзгерте алмайды.
Әлемдегі болып кеткен, болып жатқан және болатын барлық нәрсе Алланың тағдыры мен қалауына сәйкес жүзеге асады.
Себебі, "Ол әр нәрсені жаратып, оның өлшеуін белгіледі" («Фұрқан» сүресі, 2 - аят)

Екінші, Алла - Әділ.
Басыңа түскен кез келген жағдай Алланың әділ үкімімен орын алады. Себебі, ол сенің не істеп, не ойлағаныңнан Хабардар және болашақта не болатыны да Оған жасырын емес. Алла Тағала ешкімге де, ештеңеге де қылдай да қиянат жасамайды. Ол бізді ешқандай қиянатсыз, әділ үкімімен басқарады. Ендеше, барлық нәрсе Оның әділ үкімімен жүзеге асып жатыр.

Үшінші, Алла - Мейірім Иесі.
Алланың мейірімі Оның ашуынан алда тұрады. Алла құлдарын жазалауға асықпайды. Ол сенің ойланып, ғибрат алып, қорытынды шығарғаныңды, Өзіне жақындай түскеніңді қалайды.

Төртінші, Алла - Даналық Егесі.
Басыңа түскен кез келген жағдайдың артында Алланың бір даналығы, бәлкім, ескертуі, бәлкім, соңғы мүмкіндігі жатыр...
Себебі, Алла тағдыр еткен кез келген жағдай бекерден - бекер болмайды. Әр нәрсенің өз сабағы, тәжірибесі мен тәлімі бар.

Бесінші, Алла құлын сынап, оның иман дәрежесін анықтайды. Оны шыңдай түседі. Қажыр - қайратын жаниды. Пісіреді. Өзіне мақтау айтуды ұмытпайтын құлын биік дәрежеге көтеріп, оны тығырықтан алып шығады.

Алтыншы, Алла адамдарды ауру беріп сынау арқылы не мал - мүлкінен, жақынынан айыру арқылы оларға "Құдайдың құлы" екенін естеріне салады. Ал құл өз Жаратушысына бағынуы керек.
Міне, сөйтіп, Алла өз құлын тазартады, Өзін еске алуға, Өзіне қайтуға, құтылуға мүмкіндік береді...

әзірлеген
Бегімхан КЕРІМХАНҰЛЫ
М. Әуезов атындағы ЖОББ мектептің қазақ тілі мен әдебиеті мұғалімі
Павлодар қаласы
Қазақстан Журналистер Одағының мүшесі