Қазақстан Республикасы күні құтты болсын!

Қазақстан Республикасы күні құтты болсын!

Әл - Фараби атындағы ҚазҰУ ЖОО дейінгі білім беру факультетінде білім алып жүрген шетелдік студенттердің құттықтауы.
25 қазанда Қазақстанда маңызды мемлекеттік мерекелердің бірі – Қазақстан Республикасы күні аталып өтеді.
2026 жылғы 22 қазанда әл - Фараби атындағы Қазақ ұлттық университеті ЖОО дейінгі білім беру факультеті шетелдіктердің тілдік және жалпы білім беру дайындығы кафедрасының оқытушылары шетелдік студенттерге арнап салтанатты іс - шара өткізді.
ҚазҰУ ЖОО дейінгі білім беру факультетінде оқитын шетелдік студенттер қазақ және орыс тілдерін меңгеріп қана қоймай, Қазақстанның тарихына, дәстүрлеріне, мәдени ерекшеліктеріне және мемлекетіміздің қалыптасу кезеңдеріне де үлкен қызығушылық танытады.
Қазақстан Республикасы күні – еліміз үшін айрықша маңызы бар мереке. 1990 жылғы 25 қазанда Қазақ КСР - інің Мемлекеттік егемендігі туралы декларация қабылданды. Бұл тарихи оқиға Қазақстанның тәуелсіз мемлекет ретінде қалыптасуына жол ашқан маңызды қадамдардың бірі болды. Қазақстан Республикасының Президенті Қасым - Жомарт Тоқаев бұл мерекенің және оның тарихи маңызының ерекше екенін бірнеше рет атап өткен.
Тәуелсіздіктің 36 жылында Қазақстан барлық салада айтарлықтай жетістіктерге қол жеткізіп, әлемдік қауымдастықта лайықты орынға ие болды. Әл - Фараби атындағы Қазақ ұлттық университеті жоғары рейтингі бар беделді жоғары оқу орны ғана емес, сонымен қатар оқытушылар мен студенттерге ғылыми - зерттеу жұмыстарымен айналысуға кең мүмкіндіктер ұсынатын ірі ғылыми орталыққа айналды.
Іс - шараға қатысқан жапондық және қытайлық студенттер барша қауымды мерекемен құттықтап, Қазақстан тарихы, Республика күні мерекесінің пайда болуы мен еліміздің жетістіктері туралы ақпаратты үлкен қызығушылықпен тыңдады.
Кафедраның аға оқытушысы А. Қ. Ахмедова арнайы дайындалған қызықты слайдтарды көрсетіп, мерекенің тарихы туралы орыс тілінде баяндама жасады. Студенттердің факультетте меңгерген орыс тілін білу деңгейі оларға Қазақстан туралы көптеген жаңа әрі қызықты мәліметтер алуға мүмкіндік берді.
Әл - Фараби атындағы ҚазҰУ ЖОО дейінгі білім беру факультетінде оқитын барлық шетелдік студент қазақ тілін үйренеді. Қазақстанның мемлекеттік тілі болып табылатын қазақ тілін меңгеру оларға ҚазҰУ - да сапалы білім алуға және күнделікті өмірде еркін қарым - қатынас жасауға көмектеседі.
Тілдерді білу, Қазақстанның дәстүрлерін, мерекелерін және мәдени ерекшеліктерін құрметтеу шетелдік студенттерге қазақстандықтардың өмірін тереңірек түсінуге, еліміздің өзіндік мәдени болмысын сезінуге, қазақ халқы мен Қазақстанда тұратын басқа ұлт өкілдері арасындағы қарым - қатынасты тануға және мемлекетіміздің тарихын тереңірек зерделеуге мүмкіндік береді.
Өткеннің озық үлгісін бойға сіңіріп, болашақтың жарқын жолына ұмтылу – Қазақстан Республикасы азаматтарының ұстанымы.
Осы айтулы мереке қарсаңында барлық оқытушыларды, студенттерді және Қазақстанның барша азаматтарын Республика күнімен шын жүректен құттықтаймыз! Баршаңызға бақыт, зор денсаулық, табыс пен толағай жетістіктер тілейміз!
Ал сүйікті Қазақстанымызға бейбітшілік пен береке, ізгілік пен бірлік, қоғамдағы толеранттылықты сақтау, барлық елдермен халықаралық байланыстарды нығайту, білім беру жүйесінің жоғары деңгейін сақтап, одан әрі дамыту, бай мәдени мұрамызды қорғау және келешек ұрпаққа жеткізу жолында толағай табыстар тілейміз!
Қазақстанымыз өркендеп, елімізде әрдайым бейбітшілік пен келісім салтанат құрсын! Республика күні құтты болсын!

Е. Р. Игнатова, М. П. Ешимов
Әл - Фараби атындағы ҚазҰУ
ЖОО дейінгі білім беру факультеті
Шетелдіктердің тілдік және жалпы білім беру дайындығы кафедрасы