Қасым-Жомарт Тоқаевқа оқулықтарды қазақ тіліне аудару туралы айтылды

Қ - Ж. Тоқаевқа оқулықтарды қазақ тіліне аудару туралы айтылды

Барлығы 100 - ден астам оқулық аударылады. Мемлекет басшысы Ұлттық сенім кеңесінің мүшесі Рауан Кенжеханұлын қабылдады, деп хабарлады Ақорданың ресми сайты.
Қазақ халқының Ұлы ақынның 175 жылдығына арналған іс - шаралар аясында Абай Құнанбаевтың шығармаларын он тілге аудару бойынша өз атынан жүргізілген жұмыстар туралы Мемлекет басшысына есеп берілді. Сонымен қатар Қасым - Жомарт Тоқаевқа «Рухани жаңғыру» бағдарламасы аясында оқулықтардың қазақ тіліне аударылуы туралы ақпарат берілді.
Рауан Кенжеханұлының айтуынша, бұл жоба осы жылдың соңына дейін аяқталады. Барлығы 100 - ден астам оқулық аударылады. Әңгіме барысында балалар арасындағы суицидтің алдын - алу, онлайн - білім беру платформасын дамыту мәселелері, сондай - ақ аударма және терминология саласына қатысты мәселелер талқыланды.
Кездесу қорытындысы бойынша Мемлекет басшысы аталған мәселелердің маңыздылығын атап өтті және мүдделі мемлекеттік органдарға үкіметтік емес ұйымдармен бірлесіп пысықтауды тапсырды.
P. S. Кезінде Елбасымыз Нұрсұлтан Әбішұлы Назарбаев «Қазақстан - 2050» Стратегиясында мемлекеттік тілді дамыту мақсатында жастар арасында конкурс жариялау арқылы қазақ тіліне аудару үшін өзекті кітаптардың тізімін жасауды тапсырған болатын.
Нұрсұлтан Әбішұлы Назарбаевтың “Болашаққа бағдар: Рухани жаңғыру” атты бағдарламалық мақаласының жарияланғанына 3, 5 жыл болды. Осы мақалада Елбасы әлемдегі ең үздік жүз кітапты қазақ тіліне аударуды тапсырған еді.
Бүгінде алғашқы 40 кітап пен оқу құралы жарыққа шықты. Оқулықтар философия, әлеуметтану, психология, тіл білімі, экономика, менеджмент, дінтану, антропология, журналистика бағыттары бойынша аударылған. Оқулықтардың әрқайсысы 10 мың данамен басылып, Қазақстанның барлық жоғары оқу орындары мен кітапханаларға тегін таратылды.

Керімсал Жұбатқанов, Қазақ - Орыс халықаралық университетінің доценті, тарих ғылымдарының кандидаты